રાગ : ભૈરવ
પદ-૧
સ્વામિનારાયણ સ્વામિનારાયણ સ્વામિનારાયણ ભજરે;
કર રે મન ચરણ વાસ; જકત આશ તજરે…સ્વામિ૦ ટેક.
નારદ સનકાદિ સિદ્ધ, ભજત જાહી અજરે;
શારદ શેષાદિ નિગમ, ગાવત ઊઠી ફ્જરે…સ્વામિ૦ ૧
પુરુષોત્તમ પ્રગટ આજ, નટવર તનુ સજરે;
કાળ જાળ નાશ હોત, ધરત ચરણ ધ્વજરે…સ્વામિ૦ ૨
અજામેલ ગુનિકાદિક, તાર્યો જીન ગજરે;
અનંત આજ મુક્ત હોત, દેખત ભરી નજરે…સ્વામિ૦ ૩
પ્રેમાનંદ સરવસ ફ્ળ, સહજાનંદ જજરે;
સર્વોપરી જાત જીતી, ત્રંબ કઠોર બજ રે…સ્વામિ૦ ૪
પદ-૨
હમતો એક સહજાનંદ સહજાનંદ ગાવે,
હમારે મન સ્વામિનારાયણ, દુસરા ન ભાવે…હમ૦ ટેક.
તપ તીરથ સાધનમેં સ્વપ્ને નહિ જાવે,
જેસે કોઈ ઘૃત છાંડ, છાસકો ન ખાવે…હમ૦ ૧
અણિમાદિક અષ્ટ સિદ્ધિ મુક્તિકું ન ચાવે,
સબકો ફ્લ સહજાનંદ ચરન ચિત્ત લાવે…હમ૦ ૨
સહજાનંદ જાપસેં ત્રિય તાપકો બુજાવે,
ઈનહિકે પ્રતાપસેં અપાર ગતિ પાવે…હમ૦ ૩
આગમ નિગમ કઠિન રહસ્ય હમે ન સમઝાવે,
પ્રેમાનંદ સાર સુગમ સહજાનંદ આવે…હમ૦ ૪
પદ-૩
હમતો એક સહજાનંદ ચરનકે ઉપાસી,
લગન મગન મતવારે છોડી સબ આસી…હમ૦ ટેક.
અડસઠ અબ કોન કરે કોન ફ્ીરે કાસી,
અષ્ટ સિદ્ધિ આદિ ચહુ મુક્તિસેં ઉદાસી…હમ૦ ૧
ચૌદલોક ભોગકે સુખ જાને સબ ફંસી,
સહજાનંદ પદપંકજ મકરંદકે પ્યાસી…હમ૦ ૨
ચરનકમલ રસ લોભી મતિકે ઉજાસી,
નારદ સનકાદિ મધુપ ગુંજત બનવાસી…હમ૦ ૩
પુરુષોત્તમ સહજાનંદ જાને સુખરાશિ,
પ્રેમાનંદ આયો શરન ચરનકો નિવાસી…હમ૦ ૪
પદ-૪
હમ તો હરિ સહજાનંદ રૂપસે મતવારે,
હમારે સુખ સંપત એ હિ પ્રાનજીવન પ્યારે…હમ૦ ટેક.
ભાવે કો સુંદર કહો ભાવે કહો કારે,
હમકું યેહી રૂપ વિના ઓર સકલ ખારે…હમ૦ ૧
દેહનમેં પ્રાનપિયા નેનનમેં તારે,
ઈનહિ પર તન મન ધન વારી ડારે…હમ૦ ૨
હમારે યેહિ કરમ રેખ ટરત નહિ ટારે,
યેહિ કારન મહામુનિ જન કોટિક પચી હારે…હમ૦ ૩
પ્રેમાનંદ નિગમાગમ કહત હે અપારે,
સહજાનંદ શ્યામસુંદર નીરખી ઉરધારે…હમ૦ ૪
