રાગ-ધોળ ‘ચાલ સખી જોવાને જઈએ, ખાંતીલો વનમાં ખેલે રે’
સુંદર સારી શિખામણ મારી, માનીલે મનવા મારા રે ।।
ધારી વિચારી મેં વાત ઉચ્ચારી, તે જોઈ સ્વભાવ તારા રે ।। ૧ ।।
પરને કહેવા પ્રવીણ છે પૂરો, પોતાનું તો તું ન પેખે રે ।।
સામાને શીખ દેવામાં છે શૂરો, નિજ દોષને નવ દેખે રે ।। ૨ ।।
કોય ન સમજે કારજ તારું, કહું છું કાંયે નહિ થાય રે ।।
શીદને ઉતારુ છે પરબારું, કાંરે ન મનાય કાંય રે ।। ૩ ।।
અવળી સમજણ અળગીએ કરી, સવળું સમજાય તો સારું રે ।।
નિષ્કુળાનંદ કહે વિચારી, એટલું માની લે મારું રે ।। ૪ ।।
